Fokus Award 14 Edition

FOKUS AWARD 2023 – EDICIONI 14

“Gjërat Kanë Ndryshuar / Things Have Changed?”

Çelja e Festivalit:
– 22 Shtator 2023 / ora 18:00 – Galeria e Arteve “Vilson Kilica”, Fier.

Ceremonia e Dhënies së Çmimeve:
– 22 Shtator 2023 / ora 20:00 – “Teatri Bylis”, Fier

Ekspozita në:
– Fier / Vlorë / Tiranë / Elbasan / Barletta & Orvieto (Ita)

“Fokus Award”, i cili organizohet prej gati dy dekadash në qytetin e Fierit duke arritur tashme në edicionin e tij të 14-të, Ju fton në Ceremoninë e Dhënies së Çmimeve ditën e premte, datë 22 Shtator 2023, ora 18:00. Fokus Award është jo vetëm festivali më i madh dhe i rëndësishëm por edhe më jetëgjati ndër festivalet e fotografisë në rajon. Festivali organizohet me mbështetjen e Ministrisë së Kulturës dhe Bashkisë Fier dhe mbledh rreth tij qindra fotografë profesionistë dhe të apasionuar rreth fotografisë duke krijuar tashmë një komunitet të konsoliduar dhe një vemendje ndërkombëtare reth tij.

Festivali shtrihet në kohë dhe qytete të ndryshme duke filluar me qytetin e Vlorës, ku në datën 20 Shtator 2023 në orën 18:00 pranë “Alpha Gallery” çel dyert ekspozita tematike “Life”. Festivali ka marrëdhënie konkrete me simotra të saj në rajon dhe botë, marrëveshje bashkëpunimi me organizata të ndryshme si FIOF – Fondi Ndërkombëtar i Fotografisë Italiane apo Fotometria në Greqi me të cilët shkëmben projekte, ekspozita dhe realizon kështu një prej objektivave të tj kryesorë i cili është ndërkombëtarizimi i fotografisë shqiptare. Në këtë prizëm, në datën 21 Shtator 2023 pranë Parkut Arkeologjik të Apolonisë , salla “Trapezeria”, çelet ekspozita me Ambasadorët e Fotografisë Italiane në Botë dhe në datë 22 Shtator 2023, në hollin e Tetrit Bylis në Fier, ku edhe do të mbahet Ceremonia Festive e Çmimeve 2023, do të ekspozohet një shfaqje me 27 autorë italianë me titullin “Ri/Svegli – Ri/Zgjime”. Në Galerinë “Vilson Kilica” të qytetit të Fierit, në datën 22 Shtator 2023, në orën 18:00 çelen ekspozitat tematike “People”, “Land” si edhe ajo me temën kryesore të konkursit, “Gjërat Kanë Ndryshuar?”. Më pas, Tirana do të jetë destinacioni tjetër në tetor me ekspozitën “Press Photo” e më tej Elbasani në datat 11 dhe 12 Tetor 2023 me një përzgjedhje fotografike nga Edicioni i 14të për të vazhduar akoma më tej në Itali, në Barletta dhe “Orvieto Fotografia” në mars të vitit 2024. Pra, ky edicion i festivalit sjell mbi 7 ekspozita tematike dhe shumë të tjera speciale për publikun shqiptar dhe atë të huaj.

TEMA KRYESORE: Festivali Ndërkombëtar i Fotografisë “Fokus Award”, për të 14 edicion sjell për publikun fotografinë autoriale bashkëkohore bazuar në një arketip ku koncepti, ideja, tema – bazuar në njësinë tezë kuratoriale – janë baza e përzgjedhjes së imazheve. Një paradigmë tashmë e përmbysur kjo – jemi fiks në momentin e kalimit nga epoka ku dukej sikur “fotokamera nuk gënjente kurrë” në atë ku imazhet – edhe realiste mund të krijohen pa përdorimin e një aparati fotografik. Duket ironike edhe shprehja e Diane Arbus se “ka gjëra të cilat është e pamundur të shikohen përpara se ajo t’i fotografonte”. “Gjërat kanë ndryshuar” – këndonte hidhesisht Bob Dylan dhe ne nuk duam aspak ta fshehim këtë gjë, përkundrazi, duam t’i dedikojmë temën kryesore të festivalit. Nuk është një sfidë mes nesh dhe makinës – “Fokus Award” me fotografitë tuaja kërkon të bëhet manifest i një rezistence artistike e cila e kapërcen këtë ndryshim duke e vënë në dyshim këtë destruktivitet të imazhit fotografik. Ekspozitat sjellin fotografi të cilat jo vetëm shfaqin vizionin e fotografëve mbi këtë ndryshim epokal por njëkohësisht rivendosin në botën e imazhit një hierarki, në majë të së cilës qëndron mendimi dhe inteligjenca njerëzore, nuhajtja dhe ndjeshmëria e fotografit. I cili duhet të vazhdojë ndërkohë që të tregojë botën dhe konditat e njerëzimit në mënyrë të përgjegjshme, të ekuilibruar, pra me autoritetin e tij, si artist. Me këtë teme dhe sfidë epokale, Fokus Award përball publikun me shqiptar një përzgjedhje prej 183 artistësh nga 25 vende të ndryshme të botës. Mbi 395 artistë nga e gjithë bota kanë aplikuar më parë për konkurset e festivalit.

ÇMIMET FITUESE: Fituesi i Çmimit “FOKUS AWARD 2023” për Temën Kryesore “Gjërat kanë Ndryshuar” përfiton një vlerë monetare prej 1000 Euro. Fituesi i Cmimit “PRESS PHOTO 2023” përfiton një vlerë monetare prej 1000 Euro. Fituesit e Çmimeve “Land”, “People” dhe “Life” përfitojnë një vlerë monetare prej 500 Euro.

ORGANIZUAR NGA: “Qëndra Albania Fokus” / Me mbershtetjen Financiare të: Ministria e Kulturës e Shqipërisë, Bashkia Fier, BenArt Print, Nikon, Zgatar Electronic / Ne partneritet me Galerine e Artit “Vilson Kilica” Fier, FIOF, Fotometria, “Alfa Gallery” Vlorë, Teatri “Bylis” Fier, Shoqata Antik dhe EJAlbum / Drejtor Artistik: Arben Alliaj / Manaxher: Saimir Ahmeti / Juria e konkursit: Maria Lanotte, Ardian Isufi, Genti Skullaku, Jetona Koçibelli, Agron Dragaj, Achilleas Tziakos. Bordi Kuratorial: Burim Myftiu, Osman Demiri, Elton Koritari.

Organizatorët dhe Bordi Kuratorial i Festivalit “Fokus Award 2023” kanë nderin dhe kënaqësinë t’Ju ftojnë në hapjen e ekspozitës dhe në konferencën e organizuar për shtypin në fillim të saj. Fokus Award, në përfundim të hapjes së ekspozitës, organizon Ceremoninë e Dhënies së Çmimeve pranë Teatrit Bylis, në orën 20:00 në një mbrëmje festive me artistët pjesmarrës, personalitetet, gazetarët dhe artdashësit e shumtë. Të ftuar në koncertin festiv janë artistët Redon Makashi, Aleksandër Gjoka, Egzona Ademi dhe Elton Deda.

Për informacione të mëtejshme apo për materiale shtesë mund të kontaktoni me zyrën tonë të komunikimit në kontaktet e mëposhtme. Një press kitt me materiale dhe informacione rreth ekspozitës mund të shkarkohet edhe në këte link: www.fokusaward.com

Kontakte: Email: info@fokusaward.com / Tel. +355693949167 / Tel. +355696472272 Ju mirëpresim

Kartela e shtypit

Shih edhe :

Tirana Photo Festival 6th Edition

Te shkruash me drite

Web 3.0