Ekspozitë fotografike. Edicioni i 2të. Datat 8 – 15 Tetor 2019, Muzeu Historik Kombëtar, Tiranë.
U organizua këto ditë edicioni i dytë i Tirana Photo Festival, eveniment i rëndësishëm i fotografisë në Tiranë. Edicioni i parë u zhvillua vitin e shkuar nga 1-9 Nëntor me temën: “Promoting Tirana Through Photography”. Festivali përfshin jo vetëm konkursin e fotografis por edhe trajnime, vizita dhe biseda me shkollat për promovimin e fotografisë dhe temës së festivalit, ekspozitën gjatë datave 8 deri në 15 tetor, çmimet për fotografët më të mirë, por dhe një sërë workshopesh dhe photo-tour si edhe photo-walk për të apasionuarit, të cilat zhvillohen gjatë ditëve të festivalit.
Tema e ekspozitës dhe e këtij edicioni ishte: “Një copëz Shqipëri… Trashëgimia natyrore dhe kulturore e Shqipërisë”.
U ekspozuan 100 fotografi nga mbi 1000 të ardhura për konkursin, i cili këtë vit u zhvillua nga 1 maj deri në 1 shtator 2019. Janë ekspozuar gjithashtu edhe 3 seri fotografike nga 3 fotografë profesionistë. Juria konkursit përzgjodhi fotot e ekspozitës dhe 6 fituesit e festivalit.
Tirana Photo Festival është projekt i DMO ALBANIA (Destination Management Organization) e cila menaxhon edhe portalin turistik të kryeqytetit Visit Tirana, ku përveçse promovon kryeqytetin dhe jep informacione të bollshme për turistët në tre gjuhë, prej tre vitesh angazhon konkurse fotografie sezonale me hashtagun e stinës, #TiranaSpring, #TiranaSummer, #TiranaAutumn, #TiranaWinter, #TiranaAutumn2019. Gjithsej, prej vitit 2016, janë organizuar 11 konkurse sesonale me pjesëmarrje është masive, kryesisht fotografë të rinj. Angazhimi i të rinjve, promovimi dhe vlerësimi i tyre është një vlerë e jashtëzakonshme e këtyre konkurseve, që ka bërë që ky komunitet të rritet vazhdimisht.
Sponsor të eventit ishin: Bashkia Tiranë, Ministria e Kulturës, Fuji Film Albania dhe Muzeu Kombëtar. Një falënderim i veçantë shkon për jurinë e konkursit: Roland Tasho, Leon Cika, Gent Shkullaku si edhe për fotografin Olsi Beci.
EJAlbum së bashku me AVizion kuroi ekspozitën përfshirë printimin e fotografive dhe komunikimin vizual. Kurator i ekspozitës ishte Elton Koritari, administrator i EJAlbum.
