Sulltane Tusha

Sulltane Tusha u lind në Durrës në vitin 1988. Ajo u diplomua në vitin 2013 në Akademinë e Arteve të Bukura në Venecia, ku jeton dhe punon. Në dy vitet e fundit, ajo u përqendrua në studimin e dekonstruimit të një imazhi të marrë nga kujtesa e përvojës, dhe më pas e rindërtoi atë sipas kritereve të pikturës abstrakte, duke bashkuar pjesët për të krijuar një histori të re, ose thjesht një perspektivë të re. Rezultati është konfuzion dhe kaos, ku lëvizja sipas logjikës bëhet e vështirë, por paradoksalisht krijohet një gjuhë universale ku shumë mund të gjejnë veten. Në të njëjtën linjë, ajo sjell një vepër për të cilën thotë: “Një shtrembërim i fakteve, informacionit, datave dhe hapësirës. Një lojë argëtuese me kreativitetin dhe arsyet intelektuale. Kujtimet shërbejnë për të ndriçuar veprën, por në këtë rast ato janë vetë vepra. Kujtime të jetuara që gjejnë një vend të ri në të ardhmen”.