Oltsen Gripshti

Për realizimin e kësaj vepre artistike, Gripshi frymëzohet nga një pranverë e trishtë dhe e mbrapshtë, sikurse ishte ajo e vitit 1997. Në thelb, kjo vepër, e cila është e realizuar me teknikën e instalacionit mbi pëlhurë, është një homazh pikërisht për tragjedinë, dhimbjen dhe lotët e gjakut të nënave shqiptare, të cilat humbën gjithçka në atë copëz historie apokaliptike të Shqipërisë postkomuniste. Vepra paraqitet nëpërmjet një kodi konceptual-surreal për të përjetësuar artistikisht një tragjedi ku të gjithë ne kemi qenë pjesë e një Kurbani për së gjalli. Ja pse vepra titullohet Kurban MCMXCVII.