Kështjellat dhe Kalatë e Tiranës – Eventi prezantues për shkollat e qytetit
13 Prill 2024 | Parku i Liqenit Artificial
Në vijim të prezantimeve publike të projektit “Kështjellat dhe Kalatë e Tiranës – Udhëzues për fëmijë e të rinj” (Tirana Castles), Family Art Guides organizoi një seri eventesh prezantuese të dedikuara nxënësve të shkollave publike dhe private të kryeqytetit, duke e çuar projektin më pranë komunitetit arsimor.
Aktivitetet u zhvilluan në bashkëpunim me APR, në disa prej hapësirave më të frekuentuara të qytetit, në Parkun e Madh të Liqenit dhe në mjediset e vetë shkollave duke krijuar mundësi që fëmijët të njihen me guidat në një kontekst të hapur, ndërveprues dhe edukativ.
Ky projekt didaktik, i realizuar në bashkëpunim me Bashkinë e Tiranës, synon promovimin e guidave të artit si instrumenta konkrete për të nxjerrë në pah dhe për të kuptuar më mirë trashëgiminë materiale dhe jomateriale të Shqipërisë. Përmes ilustrimeve, informacionit të strukturuar sipas grupmoshave dhe elementëve praktikë, nxënësit u njohën me historinë e kalave të Tiranës dhe rëndësinë e tyre në identitetin kulturor të qytetit.
Gjatë këtyre prezantimeve, fëmijët u angazhuan në aktivitete kreative, diskutime dhe ushtrime orientimi, duke e përdorur guidën si një mjet eksplorimi. Qasja synoi të ndërtojë një marrëdhënie më të drejtpërdrejtë mes nxënësve dhe hapësirave historike, duke e kthyer trashëgiminë në një përvojë të prekshme dhe të kuptueshme.
Ky cikël eventesh shënon një fazë të rëndësishme të projektit, duke e integruar atë në jetën shkollore të qytetit dhe duke forcuar bashkëpunimin mes institucioneve kulturore dhe atyre arsimore, në funksion të edukimit dhe ndërgjegjësimit të brezit të ri.
Shiko edhe:
“Kështjellat dhe Kalatë e Tiranës” – Workshop
Family Art Guides prezanton “Tirana Castles” në Petrelë
Family Art Guides prezanton “Tirana Castles” në zemër të qytetit