Lumturi Blloshmi

Lumturi Blloshmi (1944 – 2020) Lindur në Tiranë në vitin 1944 dhe e diplomuar ne Akademinë e Arteve në vitin 1968, Lumturi Blloshmi është një ndër artistet më të veçanta shqiptare. Thënë ndryshe, prej dekadash tashmë ajo është një univers në trasformim të përhershëm, dhe punët e saj, përherë pothuaj në cikle, janë vorbulla të fuqishme energjie; si të jenë tablo të realizuara “en plein air”, kompozime simbolike, fotografi, kolazhe apo edhe performanca. Mendimi që merr formë në një vepër të Blloshmit ështe përherë përtej kufijve të realitetit, edhe kur frymëzimi vjen nga banaliteti i përditshëm. Në këtë metamorfozë konstante të zhvillimit të saj artistik dhe në kerkimin e përhershem të vetvetes në relacion me dimensionet e artit në kohë, tashmë vetë artistja është bërë pothuaj (edhe pa atë mitizimin e zakonshëm të kërkuar nga vetë sistemi i artit bashkëkohor) një medium me një pozicion mjaft të qartë metafizik brenda dhe jashtë vetë sistemit.